Quen somos
Co nome de Nova Escola Galega nacía o 11 de Xuño de 1983, en Santiago de Compostela, un movemento asociativo de base, coa finalidade xeral de impulsar o traballo de renovación pedagóxica e de galeguización lingüística e curricular do sistema educativo de Galiza.
Grazas á agrupación e cooperación de ensinantes de calquera nivel educativo e das persoas socias e colaboradoras -vencelladas ou non ao eido do ensino-, Nova Escola Galega constitúe un espazo de reflexión, formación e reivindicación centrado na construción dun sistema educativo galego, público, democrático e feminista.
Así, desde hai máis de 40 anos, somos un espazo independente e de encontro para todas aquelas persoas que se recoñecen no traballo socioeducativo progresista, innovador e transformador.
Nova Escola Galega é unha asociación declarada de Utilidade Pública (Orde INT/2335/2008, BOE 5/08/08).
Os obxectivos de Nova Escola Galega
1
As prácticas educativas
A procura e a elaboración de prácticas educativas que tomen en conta todos os aspectos físicos, afectivos, sociais e intelectuais da personalidade das persoas en formación.
2
A pedagoxía alternativa
A definición e loita por unhas condicións necesarias para unha pedagoxía alternativa orientada desde o Proxecto ou Modelo de Escola Pública que preconizamos.
3
O perfil profesional
A modificación dos perfís profesionais dos educadores, desde a óptica dunha nova profesionalidade afastada de visións tradicionalistas e autoritarias.
4
A compresión crítica
A batalla contra a cultura prefabricada, case sempre imposta aos alumnos e alumnas sen deixarlles a posibilidade de verificar e de comprender criticamente o conxunto de achegas culturais.
5
A normalización da lingua
A inculturación galeguizadora e a loita pola normalización lingüística en Galiza.
6
O currículo e a formación
A busca dunha concepción curricular e formativa unitaria, interdisciplinar e integradora.
7
A xestión democrática
A procura dunha xestión democrática das institucións educativas, que sexa unha efectiva xestión social anti-autoritaria, anti-burocrática e anti-corporativa.
8
A laicidade
A afirmación da laicidade da educación pública ou sostida con fondos públicos, da coeducación, da promoción da igualdade e da integración das diferenzas; é dicir, unha educación democrática e democratizadora, como parte dunha sociedade democrática e socialmente avanzada.
9
A Igualdade
A loita pola igualdade real e efectiva entre mulleres e homes, desde o ensino en particular e cara a todos os eidos da sociedade.
