Grupo Cavila

Xa son máis de dúas décadas nas que está en activo o Grupo Cavila. O tempo pasou axiña, sobre todo, grazas a un traballo compartido e cheo de ilusión.

Esta é a perspectiva na que se asenta o traballo do Grupo Cavila. Persoas de diferentes perfís profesionais con algo en común: preocupadas pola calidade educativa e dentro dela, pola importancia dos materiais e medios curriculares e didácticos, destacando a súa vertente analítica e avaliativa.

Falamos dun proceso avaliativo formativo que permite identificar novas metas dentro dunha cultura profesional comprometida coa calidade educativa. A finalidade: identificar o impacto dos materiais na práctica educativa e considerar as posibilidades que poden ofrecer para realizar que esta sexa equitativa, adaptada, xusta e comprometida coa mellora social, entre outros aspectos.

Ao mesmo tempo, o grupo configúrase coma un espazo de interelación de contextos educativos escolares e sociocomunitarios. Isto favorece, tanto o coñecemento como a comprensión mutua, identificando necesidades, pero sobre todo, creando posibilidades de crecemento compartido. Son sinerxías colaborativas que, a veces traspasan ao propio grupo, pero que ao final, sobre todo, repercuten positivamente no verdadeiramente importante da educación: as persoas cara as que se dirixe.