Faladoiro Mocidade e igualdade

O vindeiro 18 de setembro terá lugar o faladoiro Mocidade e igualdade, unha proposta que pretende darlle continuidade ao vivo debate iniciado o ano pasado cunha actividade na que se abordou o significado e alcance da Coeducación no século XXI.

As controvertidas reaccións que se poden recoñecer na mocidade actual en relación cos avances da igualdade esixen novas análises e, no seu caso, a reorientación das políticas activas a prol da igualdade tanto na sociedade como no ámbito escolar.

Contarase con participantes de distintos eidos e mesmo coa presenza dalgún mozo ou moza que poida achegar a súa opinión:

• Concha Fernández Fernández, psicóloga e profesora, especialista en cuestións de xénero e comunidade.
• Sonia Fernández Casal, profesora, especialista en cuestións de xénero.
• Xosé Cabido Pérez, profesor, especialista no estudo das masculinidades.
• Estudante, pendente de concretar

Moderará o faladoiro Xurxo García García, mestre de primaria e integrante do GT Coeducando (NEG)

A actividade é totalmente gratuíta e de libre asistencia ata completar a capacidade do local.