Os ENCONTROS DE DEBATE SOBRE O MEDIO RURAL GALEGO son unha iniciativa de Nova Escola Galega, que comeza en 2006, ano a partir do cal se desenvolveron edicións anuais (Santiago, Chantada, A Capela, Boimorto, Allariz, Devesos-Ortigueira, Granxa Barreiros-Sarria, Samos, Cervantes, Sedes-Narón...), que retoman a xeira doutros catro Encontros realizados nos últimos anos oitenta.
Estes foros pretenden achegarlle ao profesorado, á comunidade educativa e á sociedade no seu conxunto reflexións sobre a historia, a actualidade e o futuro do medio rural galego, con especial atención ao papel que neste medio desenvolven a cultura e a educación, ben desde a propia institución escolar ou ben desde outras iniciativas de carácter socioeducativo e/ou comunitario promovidas por entidades diversas e asociacións do eido cultural.
Desde os seus principios esta actividade procurou servir de espazo de encontro e confluencia de diferentes profesionais e colectivos galegos (sobre todo locais) e de fóra de Galicia, para dar a coñecer e impulsar accións a prol dun futuro sustentable para o medio rural, horizonte no que o papel da cultura e da educación adquire unha importancia estratéxica, tal e como afirman distintos organismos internacionais.
Este ano, ademais do X Encontro, celebrado en Narón (A Coruña) a finais de marzo, NEG vai celebrar na Pontenova (Lugo) outro encontro baixo o título I Xornada da Terra de Miranda.
Obxectivos
· Análise da situación do medio rural e debate de alternativas encamiñadas á elaboración dun plan específico de desenvolvemento.
· Constituírse como punto de encontro de todas aquelas persoas interesadas polo presente e polo futuro do medio rural galego e da súa educación.
· Presentar alternativas e experiencias de desenvolvemento comunitario, cultural, e educativo, centradas no medio rural.