DESCRICIÓN XERAL DA ACTIVIDADE
Este seminario de carácter práctico, procura proporcionar aos profesionais docentes criterios para a selección e avaliación dos materiais didácticos.
A actividade ofrece diferentes propostas e modelos de avaliación para a análise dos diferentes tipos de materiais (libros de texto, guías, Cds, Webs, videoxogos, xoguetes, etc.), desde diferentes perspectivas e ámbitos do desenvolvemento pedagóxico.
Deste xeito coñeceremos formas máis coherentes de achegarnos aos materiais en función de cada modelo e proxecto de escola. Así mesmo, serviranos para facer un uso máis coherente e crítico dos materiais en relación cos contextos educativos e curriculares de cada centro. Ademais, axudaranos a repensar o significado dos materiais didácticos nos diferentes momentos do seu desenvolvemento e a coñecer cales son as consecuencias que se derivan na práctica do uso que se realiza dos mesmos.
OBXECTIVOS
-Comprender a utilidade de avaliar os materiais didácticos.
-Favorecer a toma de decisións ao redor de materiais curriculares no contexto escolar dun xeito crítico e construtivo.
-Identificar as diferentes modalidades de guías e de modelos de avaliación dos materiais didácticos.
-Analizar e revisar as guías e modelos de avaliación dos que poden dispoñer os profesores/as de utilidade práctica na toma de decisións.
-Aprender a utilizar as propostas de avaliación de distintos tipos de materiais
-Analizar colaborativamente os recursos didácticos.
METODOLOXÍA do SEMINARIO
AS SESIÓNS TEÓRICAS
A conferencia, o relatorio e a mesa redonda, servirán para axudarnos a situar a cuestión da avaliación no conxunto das tomas de decisións que poidamos adoptar en relación cos recursos.
OS OBRADOIROS
Son sesións baseadas nunha metodoloxía activa, preténdese que o asistente teña a posibilidade de iniciarse no desenvolvemento práctico da avaliación con aqueles materiais e recursos cos que conta na súa actividade profesional diaria.
O asistente terá a oportunidade de participar en dous obradoiros. En liñas xerais a estrutura dos obradoiros en cada unha das modalidades será a seguinte:
Cada poñente presentará modelos de avaliación ou unha selección de criterios científicos para avaliar os materiais aos que fai referencia o seu obradoiro. Posteriormente realizará un achegamento ao desenvolvemento de avaliación e funcionalidade. A continuación procederase ao desenvolvemento práctico co conxunto dos asistentes para que se inicien no proceso de avaliar. Rematada esta sesión teórico-práctica proporase unha posta en común (mesa redonda) dos resultados atopados, froito da análise dos materiais, e procederase a reflexionar sobre o que supuxo o proceso de avaliación dos recursos achegados polos asistentes.